Tualthattu dam chhung táng turin hrem

Vanlalduati, Lunglei Chanmari Veng thattu Lalchawimawia (24) s/o Piangthiauva, Tahan F Group, Myanmar chu nimin khan Lunglei District & Session judge TL Guite chuan dam chhunga jail-a táng tur leh Rs 5,000 chawi turin a hrem.

Lalchawimawia hi tualthah thubuai bakah, dawr rawk thubuaiah thiam loh chantir a ni bawk a; he thubuaiah hian kum 8 táng tur leh Rs 5,000 chawi tura hrem a ni. Pawisa a chawi loh chuan thla khat dang tàn belh tura tih a ni bawk.

Lalchawimawia hian September 6, 2021 tlai dar 6 vel khan Vanlalduati chu Lunglei Chanmari-a a dawra a awm laiin chemtêin a vit a, Vanlalduati chu a thi nghal. Lalchawimawia chu a tlanbo a, police-te'n September 8, 2021 khan an man a, Lunglei Police Station-ah thubuai ziah luh a ni.

Police-te chuan an hnu­­chhuina report (charge­sheet) chu January 19, 2022 khan court-ah an thehlut a, February 16, 2022 aṭangin court-in thubuai a ngaihtuah ṭan. June 14, 2023 khan thutlukna siam a ni a, nimin khan tualthattu hremna puan a ni.

Lalchawimawia hi April 19, 2023-a Lunglei District Jail aṭanga tlânbo mi panga zingah a tel a, April 25 khan Hnahthial district-a Khawri rama thlámah man leh a ni.