Chief secretary hlui Congress-ah a lut: 'Sorkar ṭha siam kan tum' - Lalsawta

Mizoram Pradesh Congress Committee (MPCC) chuan nimin khan Vanapa Hall-ah City Workers Meet an buatsaih a, chief secretary hlui Lalnunmawia Chuaungo leh mi langsar tak tak ṭhenkhat Congress party-ah an lawm lut. MPCC president Lalsawta chuan, sorkar ṭha siam an tum thu leh an candidate-te chu mi dik leh rintlak an nih dawn thu a sawi.

Congress party President chuan, ram enkawl chungchangah sorkar ṭha a pawimawh thu sawiin, "Mipui leh ram ṭha Pathianin min pe a, sorkar ṭha siam turin kan thei a, kan tlin a, chu chu Congress party-in kan tum a ni. Kan ram hi kan siam dawn a, nakin atan kan dah thei lo, tunah a ni kan tih dawn," a ti.

Election Commission-in inthlanah MLA candidate-te sum hman tur a ruahman thu leh kohhranin sum séng lo tura an ngen thu sawiin Lalsawta chuan, "Inthlanna thianghlim leh ṭha nei turin min vil dawn. Sum séng tamte'n sorkar huna mipui sum an lâk ṭhen leh tur ni loin, keini chuan sum ni loin Pathian lam kan hawi a ni," a ti a; an sorkar leh sorkar loh chu Pathian thu thu a nih thu a sawi.

MPCC President chuan, party ṭhenkhat chu inthlan behbâwma an lungmuanna chu sum a nia sawiin, "Keini chuan sum kan nei lo. Candidate-te mi hausa ni lo mahse mi ṭha, mi dik leh rintlak an ni dawn. Mizoram tana sorkar ṭha siam turin Pathian lam kan hawi a, keini hi mahni aia ram dah hmasa turin Pathianin min ko a ni," a ti.

Congress president Lalsawta chuan, an party zawm tharte chungchang sawiin, "Ram siamṭha tura kan mi sàwm te, khelh fuh tum lo, politics-a tih fuh tum lo, kan hnena an lo kal chhan chu Congress-in hna Mizoram tana kan thawhpui theih tura an rilru siamsaktu chu Pathian a ni," a ti a, Pathian chungah an lawm thu a sawi.

MPCC tarlan danin, nimina Congress party-a lawm luh zingah hian chief secretary hlui Lalnunmawia Chuaungo, MPS officer hlui Lalbiakzama, journalist pahnih Lalremruata Renthlei (The Aizawl Post) leh Vanneihthanga Vanchhawng te an tel a; unit hrang hrang aṭangin mi 772 an lawm lut bawk.

MPCC vice president Lal Thanzara kaihhruai inkhawmah hian lawm luhte zinga mi Lalnunmawia Chuaungo chuan, state danga an thil tih ṭha ang chu Mizoramah a tih ve theiha a hriat thu sawiin, "Thil zawng zawng tih theih loh mah se, thil ṭha eng emaw zat chu Mizoram tan a tih ve theih dawn niin ka hria a, chuvangin, politics-ah ka zuang lut a ni," a ti.