Raltlante tana sum leh pai thawh thei MLA leh sorkar hnathawk zingah zawn tum

Manipur tualchhung buaina vanga sahimna zawnga Mizorama rawn lutte chhawmdawl dan tur ngaihtuah tura din Executive Committee on Internally Displaced Persons (IDP) of Manipur chuan MLA leh sorkar hnathawk zingah ráltlânte tana sum leh pai thawh thei an awm chuan hmalak ni se, an ti.

Committee hi nimin khan an chairman H Lalengmawia, Home secretary hoin Forensic Science Laboratory conference hall-ah an ṭhukhawm a; Manipur ráltlânte chhawmdawlna tur sum leh pai a theih ang anga dap dan an ngaihtuah. Râltlân zingah damlo leh natna khirh tuarte enkawl dan tur mumal tak ruahman a ṭul thu an sawi.

Relief camp awmna district - Aizawl, Kolasib leh Saitual district-a DC-te leh Central YMA hruaitute'n ráltlânte chhawmdawlna atana hma an lak dan leh harsatna an tawhte an tarlang a, harsatna sutkian dan tur an sawiho nghal.

Fûr a inṭan tawh avangin ráltlânte tawm hulna tur tem­porary shelter sak chawp hman ai chuan, sorkar hmunhma remchang luah tur zawn ṭha an ti a; ráltlânte chhinchhiahna mumal leh felfai tak siam tura High Level Committee thutlukna lo awm tawh sa bawhzui zel dan tur an sawiho bawk.

Health department hotute chuan, ráltlânte hriselna dinhmun an vil dan leh damlote an buaipui dan tarlangin; ICDS nen ṭang tlángin naupangte hnenah ei tur ṭha an pek ṭhin thu an sawi.

School Education department hotute chuan, ráltlân zingah zirlai 1,500 chuang chu Mizorama sorkar sikul hrang hrangah luhtir an nih thu leh, ráltlân zirlai admission ti duhte'n lehkha pawimawh an neih loh pawhin ngaihnathiamna an neih thu an sawi a; higher education zirlaite chungchangah pawh hmalak mek a nih thu tarlan a ni.

Home Secretary chuan, chief minister Zoramthanga'n ráltlânte ṭanpuina Prime Minister leh Union Home Minister hnena a dil chu a hlawhtlin beiseina sang tak an neih thu a sawi.