Sorkarin Manipur ráltlân tan buhfai qtl. 2,388.50 a pe tawh

Chief minister Zoramthanga chuan, Manipur tualchhung buaina avanga sahimna zawnga Mizorama lutte leh Manipur-a la awmte tan Mizoram sorkarin buhfai quintal 2,388.50 a pe tawh tih nimin khan a tarlang.

Zoramthanga chuan, Manipur buaina avanga harsatna tawk Zo hnah­thlakte tan Mizoram sorkarin buhfai leh mamawh dang eng emaw zat a pe tawh tih Instagram-ah a tarlang a, "Tun dinhmunah Manipur buaina avanga sahimna zawnga Mizoram inpui rawn bêltute hi mi 11,785 an tling tawh. Kan ṭhenawm Manipur, Myanmar leh Bangladesh aṭanga sahimna zawnga Mizoram rawn bêltu Mizoram sorkarin a lo tuamhlâwm leh enkawl mek mi 50,000 chuang an awm mek bawk," a ti.

Sahimna zawnga Mizoram rawn bêltute lo tuamhlâwm chu an duh dan a nih thu sawiin Zoramthanga chuan, "Mihring mihrinna thinlung aṭang pawhin kan neih leh kan tih theih tam lo mah se, sahimna zawnga Mizoram rawn bêltute lo tuamhlawm leh kan neih ang ang lo pek ve hi kan duh dan a ni. Mizoram hi Zo fate inpui a ni reng dawn," a ti.

Chief Minister chuan, "Manipur buaina avangin Mizorama chêng Meitei-te an him loh phah lo a, hlauhthawn tur a awm hek lo, khua leh tui ṭha tute tan pawh hmun him a ni," a ti a; Mizoram ang bawkin Manipur pawh Zo hnah-thlakte tan hmun him ni ve se a duh thu a tarlang bawk.