Kawrthah-Rengdil inkarah kuhva hâl; Kuhva chíngtuten mahnia chinfel mai ṭha an ti

June 19, Thawhṭanni zan dar 7:30 vel khan Mamit district-a Kawrthah leh Rengdil inkarah dan loa phurh kuhva rah ip eng emaw zat man a nih hnuah hâl a ni. Hetih lai hian, Hachhek Bial Kuhva Chingtu Pawl (HBKCP) chuan an hnuaia association/society-te chu kuhva rah an manin, an duh anga action lak phalsak an nih thu an hriattir.

Vanglaini thu dawn danin, Hachhek bial huam chhunga kuhva chíngtute chuan June 19 zan dar 6:30 vel khan Rengdil leh Kawrthah inkarah truck pahnihin dan loa an phurh kuhva rah an man. Kuhva rahte chu kawng sir remchangah an buntir a, lirthei leh a khalhtute chu an chhuahtir a ni.

Kuhva rah man sa kawngpui sira dah chu June 19 zan dar 7:30 velah a kâng a, a kâng fai vek a, ip 200 vel nia hriat a ni.

HBKCP chuan, an huam chhung khaw tina kuhva chíngtu pawlte chu an huam chhung ṭheuhah dan loa kuhva ro phurhte en thlithlai turin an chah a, "Zamuang Check Post thleng loa man a awm pawhin hriattirna kan lo siam tawh ang khan, a mantu association/society-te'n an duh anga action lak phalsak an ni," an ti.

Dan loa kuhva man chungchanga Mamit DC order ding lai a awm reng laia Hachhek bial chhungah tun thlenga phurh luh a la ni reng chu an duh loh thu an tarlang a; tun hnuah chuan ti lui tawh lo turin mi tin an ngen nawn leh a ni.

An ngenna ngai pawimawh loa ti lui an awm a, harsatna an tâwk a nih pawhin an cho chhuahah an ngaih tur thu tarlangin HBKCP chuan, "Sorkar hnathawk emaw, mimal emaw pawh hetianga inhnamhnawih hriat chhuahte chu a na thei ang bera an chunga action lak a nih theih nan thuneitu sang zawka thlenin hma kan la zel ang," an ti.