Fûr atan buhfai chhêk khawl

Food, Civil Supplies & Consumer Affairs (FCSCA) department chuan kumin fûrpui atan inbuatsaihin district hrang hranga Supply centre 74-ah buhfai quintal 1,70,000 vel an dah tawh a, fûr laia hmun tlawhpawh harsa ṭhenkhatah chuan kumin daih buhfai an dah tawh.

FCSCA hotute chuan Vanglaini palai zawhna chhángin, June 19, 2023 thleng khan supply centre 74-ah kumin monsoon stock turin buhfai quintal 1,70,000 vel dah a nih tawh thu an sawi a, "Kum tina kan buaina ṭhin, fûrpui laia kalpawh theih lohna Mizoram chhim lam leh khawthlang lama centre 16-ah an mamawh khawp kan dah vek tawh a, hmun ṭhenkhatah chuan kumin December thla thleng daih kan pe tawh," an ti.

Supply department hotute chuan, buhfai an la dah khah lohna centre ṭhenkhatah pawh an dah mek thu leh buhfai an dahte chuan râltlânte a kêp thu an sawi bawk.