Minister-in sikul sak ṭhat tur a tlawh

Minister Lalruatkima chuan nimin khan a bial chhunga sikul sak ṭhat tur Tuikual North Middle School leh Vaivakawn High School-te a tlawh a, "Zirtirtu indaih lohna phuhru turin sorkar term kal mekah zirtirtu 3,000 chuang lak a ni tawh," a ti.

Lalruatkima chuan, Mizoram sorkarin zirna tihhmasawn a ngai pawimawh nia sawiin, "Zirtirtu indaih lohna phuhru turin sorkar term kal mekah zirtirtu 3,000 chuang lak a ni tawh. Zirtirtute chungah zirlaite hmakhua a innghah avangin zirtirtu hna hi rinawm leh ṭha takin thawk zel ang che u," a ti a, zirlaite chu lehkha chhiar tam tur leh an thiamnate ram leh hnam tana hmang turin a fuih.

A bial chhunga sikul pahnih sak ṭhat a ni tur chu lawmawm a tih thu sawiin Minister chuan, hna ṭha leh tlo a awm theih nan khawtlang hruaitute leh sikul thuneitute thawhpuina a ngen a, "Fûr ruahtui Mizoramin a dawnte khawl khawm a ṭul a, sikul sak ṭhatna turah pawh fûr ruahtui khawlna ngaih pawimawh ni se," a ti.

Minister hi AMC deputy mayor R Thanglura'n a ṭawiawm a, sikul enkawltute nen Ministry of Tribal Affairs-in sum a pek hmanga sikul sak ṭhat dan tur an sawiho. Kum 1970-a din Tuikual North M/S sak ṭhat nan cheng nuai 60 ruahman a ni a; kum 1992-a din Vaivakawn H/S sak ṭhat nan cheng nuai 70 ruahman a ni.