Smart Parking sak tur lungphùm phúm

Deputy chief minister Tawnluia chuan nimin khan Dinthar vengah Smart Parking sak tur lungphûm a phúm a, "Smart City Project hian eng emaw chen Aizawl khawpui hmél a tidanglam dawn a ni," a ti.

Smart Parking hian ram sq.metre 3,274-a zau a awh dawn a, cheng nuai 1,338 sénga sak tur a ni. February 11, 2023-ah contract agreement ziah a ni a, June 30, 2024-ah sak zawh tura ruahman a ni. Lirthei ke pali nei 52 leh ke pahnih nei 45 dah theih tura ruahman a ni a; mikhual thlen theihna dormitory leh VIP room a awm dawn bakah, futsal ground a awm dawn a ni.

Deputy Chief Minister chuan, Aizawl Smart City project hnuaia sak tur Smart Parking chu a puitlin hun tur nghahhlelhawm a tih thu a sawi a, "Kawr kamah, Tuikual luiin a tan tlangna hmunah sak a nih dawn avangin a ruangám pawh uluk taka duan a ni a, a satute pawhin uluk leh fimkhur taka ṭhahnemngai taka an thawh a ngai dawn a ni," a ti.

Smart Parking hmunah riahna, khualbuk anga hman theih tur dah a ni dawn tih sawiin Tawnluia chuan, "Ebenezer Hospital-a damlo enkawltute'n an hman ṭangkai ka beisei," a ti a; futsal ground dah tel a nih dawn thu a sawi.

Bialtu MLA Lalruatkima, minister pawhin thu sawiin, "Dinthar khawtlangin project a puitlin theih nan thlânmual ram zau tak an sât thla a, sorkar ram MINECO huam chhungah GAD-in ram zau tak a pe bawk a, an chungah ka lawm tak zet," a ti a; ṭha taka sak zawh a nih a, mipuiin an chhawr ṭangkai ngei a beisei thu sawiin, sorkarin hmalakna leh hmachhawpte thláwp turin mipui a sáwm. AMC deputy mayor R Thanglura'n thu a sawi bawk.