MPF khak ngaia awm pawi ti

ZPM Ṭhalai chuan thuchhuah siamin, Mizoram People Forum khak ngai khawpa therhlo hmanga Robert Romawia Royte a campaign chu pawi an tih thu an tarlang.

Robert Romawia Royte chu a bial ngaiah ding ngam tawh loin a tlanchhia nia sawiin ZPM ṭhalaite chuan, "A vawi khat MLA-naah a bial ngaia ding nawn ngam loa Hachhek bial lama a ráltlânnaah MPF-in an khak hial ngai khawpa sum leh therhlo hmanga a campaign hi pawi kan ti. Mizoramah inthlanna fel leh thianghlim a awm theihna tura MPF hmalakna a zah zo lo hi pawi kan ti a, a zah tawrh chakthlâk hleah kan ngai," an ti.

ZPM Ṭhalai chuan, "Mizoramah mipui rilru hruai dik a hnêka a hruai kâwi leh khawlo thei zawnga che ṭhin politician an la awm cheu hi pawi kan ti," tiin, vai rama inthlan ang maia sum leh therhlo hmanga vote zawng tawh lo turin an ngen a; nghet taka ding a, lei theiha awm lo turin mipui an chah bawk.