KHAWTHLIR

NSS-in thisen pe

KM Higher Secondary School NSS unit chuan nimin khan Civil Hospital, Aizawl tan thisen unit 36 an pe a, petute mipa 23 leh hmeichhia 13 an ni.

E.Roll sawiho

Siaha District Standing Committee on 2nd Special Summary Revision of Photo Electoral Rolls chu nimin khan DC conference hall-ah district election officer Lalhmunsanga Hnamte, bawrhsap kaihhruaiin an ṭhukhawm. Kuminah MLA inthlanpui a awm avangin electoral roll hi ennawn leh tur a ni a, October 4, 2023-ah final roll tlangzarh a ni ang. Siaha district-ah hian voter 43,568 an awm mek a, mipa 21,194 leh hmeichhia 22,374 an ni.

MLA-in laptop hlan

Aizawl West-III bialtu MLA VL Zaithanzama chuan nimin khan a bial chhunga HSSLC 2023-a top 10-a lang mi pali hnenah lawmpuina atan laptop a hlan. Zaithanzama chuan, zirna chu ram siamṭhat nan leh hnam humhalhna atana ṭha ber pakhat a nih thu sawiin, "HSSLC leh HSLC hi kailàwn hmasa chauh a ni. Thawhrim a ngai a, hrisel a ngai bawk a, kan invawng tur a ni," a ti.

Smart class dinna tur hmanrua pe

Assam Rifles chuan YMA Day pualin YMA, Mission Vengthlang Branch hnenah smart class dinna tur hmanrua eng emaw zat an pe. Assam Rifles chuan, smart class dinna tur hmanrua an pek chhan chu zirna lama hma lak a, thâ thawh ve an duh vang a nih thu an tarlang.

ASF a lêng

Champhai Vengsangah nimin khan African Swine Fever a léng tih finfiah a ni a, vawk hri lênna hmun, infected area-ah puan nghal a ni. Champhai Vengsang aṭang hian vawk lak chhuah emaw, hmun dang aṭanga lak luh emaw phal a ni lo a; vawk thite chu thûk takah chinai nen phûm tur a ni a, Champhai Vengsangah vawk talh leh vawk sa zawrh khap tlat a nih thu Champhai District AH&Vety officer Dr B Lallawmsanga'n a puang.