Ui talh leh ui sa zawrh a tlem theih nan sorkar hotute'n dan kenkawh an rel

Mizoram State Animal Welfare Board (MSAWB) chu chairman Lalrinawma, minister hoin June 20, Thawhlehni khan Secretariat conference hall-ah an ṭhukhawm a; ui talh leh ui sa zawrh a tlem zawk theih nan The Mizoram Animal Slaughter (Amendment) Act chu a taka kalpui an rél.

Ṭhutkhawm hi AH&Vety secretary Lalzarmawii'n a kaihruai a; ui talh leh ui sa zawrhna a tlem theih nan 'The Mizoram Animal Slaughter (Amendment) Act 2020' a taka kalpui an rél a, ui sa zuar tihrêm nan ui talh leh a sa zuar ṭhinte lakah a ṭul anga complaint thehlut turin MSAWB-in hma la se, an ti.

AH&Vety Call Center Helpline number 1962-chu ran leh ramsa tiduhdah an awma mipuiin thuneitute hnena an hriattir theih nan zawm ve an rêl a; Cruelty to Animals Act-hnuaiah Police leh Trans­port department-te chu zirchianna neihpui leh zirlai naupangte hnenah inzirtirna kalpui an rel.

Mizorama village council leh local council-te hman tlân theih tur ran khuahkhirna dan ṭha zawk siam turin The Mizoram Animal (Control & Taxation), Act 2014 chu ngun leh zuala zir chian te, ran thi phûmna tur (common cementry) siam turin LC leh VC hnenah a ṭul anga ram dilte an rél bawk.

Meeting chuan, ran chhanchhuahte enkawl emaw, la chhawng duh an awmin inkaihhruaina fel tak a awm theih nan AH&Vety department-in Prevention of Cruelty to Animal Act, 1960 hnuai­ah inkaihhruaina fel tak siam se, an ti a; ran phurh chungchangah The Transport of Animal Rules, 1978 chu khauh zawka kalpui ni se, an ti.

Ran chungchanga dan bawhchhe lo tura inzirtirna uar zawka kalpui turin kohhran leh páwl hrang hrang hnenah lehkha sem ni se, an ti a; dan bawhchhiate hrem an nih theihna tura hma la turin JB Foundation an ruat.

Ui inthlah puntir leh zawrh chungchangah The Prevention of Cruelty to Animals (Dog Breeding and Marketing) Rule, 2017 chu khauh zawka kalpui an rel a; ui inthlah puntir duh bikte chu State Animal Welfare Board-ah an inziah luh ngei theih nan hmalak ni se, an ti. Ran leh ran inkar leh, ran leh mihring inkara buaina thleng ṭhinah a ṭul anga hma lak a nih theih nan AH&Vety department-in inkaihhruaina siam se, an ti bawk.