Thenzawl dist. a pian theih nan hma latu tur committee din a ni

YMA, Vantawng Group bultuma Thenzawla tlawmngai pawl hrang hrang leh political party-te June 20, Thawhlehni zana ṭhukhawm chuan Thenzawl district a pian theihna atana hma latu tur Thenzawl District Demand Committee (TDDC) an din.

Ṭhutkhawm hi Vantawng Group YMA president C Lalnunthara'n a kaihruai a; Thenzawl district siam a nih theihna tura tun hma aṭanga hmalak a nih tawh ṭhin dan te, tun hnaiah Thenzawl Area MUP Conference leh Vantawng Group YMA Conference rorelah Thenzawl district siam a nih theih nan sorkara ngen ni se tia rel a nih thu te, Mizoram leh Thenzawl hma lam hun tur ngaihtuahin, Thenzawl chu khawpui lian zawk ni tura buatsaih a pawimawh thute tarlan a ni.

Thenzawl district siam theih nan theihtawp chhuaha hmalak rélin, TDCC an din nghal a, office bearer atan tlawmngai pawl hrang hrang aiawh an inruat. Adviser atan Thenzawla political party hrang hrang block president ṭheuh dah an ni bawk.

Meeting chuan, Thenzawl district a pian theih nan tharum thawhna leh nawrhna huaihawt zawng ni lo a, theihtawp chhuaha thuneitute hnena ngen leh an duhna lantir ṭha an ti a; Thenzawl district huam chin tur angte ruahmanna siam a, khaw hrang hrangte thawhpuia sawm an rel a ni.