Yoga Day hman a ni

Nimin June 21 kha International Yoga Day vawi 9-na a ni a, Mizoram hmun ṭhenkhatah hman a ni. Kumina Yoga Day thupui chu, 'Yoga for vasudhaiva kutumbakam (Khawvel inpumkhatna atan Yoga)' tih a ni.

International Yoga Day hi zing karah Governor Dr Hari Babu Kambhampati leh a nupui Dr Jayashree Kambhampati te hoin Rajiv Gandhi Stadium-ah hman a ni a; Yoga hmanga insawizawina hun an hmang.

Governor chuan, Yoga chu khawvelah mi tam takin taksa tih hriselna atan an hmang mek nia sawiin, "India-in mi dangte mamawh leh mi dang tana thil ṭangkai a pek chhuah pawimawh tak tak zinga pakhat a ni," a ti a; ni tin khawsak phung avangin zunthlum, cancer leh natna dangte leh, rilru lama harsatna nei an tam tih sawiin, "Heng kan harsatnate aṭanga kan fihlimna turin Yoga hmanga taksa sawizawi hi kan tih theih chuan a hlâwkna kan tél ngei ang," a ti.

Yoga Day hmannaah hian Health secretary Esther Lal Ruatkimi'n Yoga Day hman chhan a sawi a; chief secretary Dr Renu Sharma leh additional DGP Ajay Choudhary ten thu an sawi bawk.

Lungleiah chuan Ayush dept. leh common service centre bultumin Lunglei Higher Secondary School-ah hman a ni a, zirlaite chu Yoga kaih­hnawih thilte tihpui an ni.

Institute of Bioresources and Sustainable Development, Mizoram pawhin Nursery Venga IBSD Research Centre-ah Yoga Day an hmang. Bawngkawna Shiv Mandir-ah pawh Central Bureau of Communication Field Office, Aizawl buatsaihin hman a ni a; KR Ghimore, Gorkha Communication chu khuallian a ni.