Kalphung thar mipui sorkar kan siam ngei dawn tih kan intiam thar - ZPM PAC

ZPM Political Affairs Committee (PAC) member-te nimina ṭhukhawm chuan, ZPM-in sorkarna an chang a nih chuan an intiam ang ngeiin 'Kalphung thar - mipui sorkar' an siam ngei dawn tih Mizoram mipui hnenah an tiam thar leh tih an tarlang.

ZPM PAC hian nimin khan Mizoram politics boruak thlirin an ṭhukhawm a, resolution siamin, "Mizoram MLA General election thla nga chauhin a dang tawh a, ZPM hmasawnna kal zel thlirin Pathian leh mipui zarah sorkarna kan chang ngei turah kan inngai. Sorkarna kan lo chang a nih chuan kan intiam ang ngeiin 'Kalphung thar - Mipui sorkar' kan siam ngei dawn tih Zoram mipui hnenah kan tiam thar leh a ni," an ti.

Mizorama ZPM hmasawnna kal zel chu lawmawm an tih thu tarlangin, "Kan hmaa General Election lo awm turah ZPM-in sorkarna a chan a, Kalphung thar - Mipui sorkar a lo pian ngei theihna turin Zoram mipuite ZPM-a lo tel vek turin kan insáwm thar leh a ni," an ti a; ṭan la chhunzawm zel turin an inchah.

ZPM PAC chuan, Aizawl East-I viltu tura ruat PL Liangdinga’n a taksa chak tâwk lohna vanga a vil zui theih dawn loh thu ziakin phatna a thlen tih tarlangin, "Lainat tak chunga pawmsak a ni. Kan party Nomination Committee hmalakna kal zel hi a ṭha kan ti a, ram pumah candidate ṭha tak tak min chhawp chhuahsak ngei pawh kan beisei," an ti bawk.