Manipur buai chhanah BJP puh

Indian Youth Congress (IYC) secretary (Mizoram & Manipur) Sarifa Rehman chuan nimin khan Congress Bhavan-ah thuthar thehdarhtute a kâwm a, Manipur buai chhanah BJP sorkar a puh. Sarifa Rehman hian June 19, 2023 khan Churachandpur leh a chhehvela ráltlânte a tlawh a ni.

Sarifa Rehman chuan, Manipur buaina vanga harsatna tâwk mekte enkawltu an awm lo tih sawiin, "Manipur-a BJP kaihhruai sorkarin eng mah an ti lo a, Modi leh Amit Shah an ngawi tlat. Media-ah pawh thil nih dan dik tak tarlan a ni lo," a ti.

Manipur Chief Minister-in mipui himna tur a ngaihtuah lo nia sawiin IYC Secretary chuan, "Buaina a awm a nih chuan mipui himna tur ngaihtuah chu CM hna a ni. Anmahni tihbuai a nih avangin eng mah an ngaihtuah lo," a ti a; Prime Minister leh Union Home Minister pawhin mipui himna turin eng mah an ti lo niin a sawi.

Zawhna chhangin Sarifa Rehman chuan, Manipur buaina chinfel mai dan tur a hriat bik rih loh thu a sawi a, "Zo hnahthlak kan tlawhte chuan buaina chinfelna atan rorelna hran an duh ber a ni," a ti.

IYC Secretary chuan, PM Narendra Modi kaihhruai sorkarah India ram a hnung tawlh zawngin a kal a, hmeichhiate himna a ṭha lo a, thil man a pung chak em em a, hna thawh tur nei lo an pung a, ram economy a chhe chak hle niin a sawi.

Nakkum Lok Sabha MP inthlan huna Congress party manifesto duang turin July 10-12, 2023 chhungin India ram hmun hrang hranga Congress ṭhalaite intawhkhawmna (Behtar Bharat Ki Buniyaad), Bangalore-ah buatsaih a nih dawn thu sawiin Sarifa Rehman chuan, "Hmun hrang hranga chêngte kan harsatna leh mamawh a inan loh avangin kan sawi khawm dawn a, sawi khawmna aṭangin India ram ṭhalaite tana ṭha tur manifesto duan a ni ang," a ti.