Mizoram Legislative Assembly Golden jubilee lawmna khâr a ni

Mizoram Legislative Assembly kum 50 tlin, golden jubilee lawmna kum khat chhung hman chu nimin khan Assembly Annexe conference hall-ah khàr a ni. Khàrna inkhawmah hian deputy chief minister Tawnluia, speaker Lalrinliana Sailo, deputy speaker H Biakzauva, minister te, MLA-te leh Former Legislators’ Association of Mizoram (FLAM) member-te an tel.

Deputy CM Tawnluia chuan, ram hruaitu hmasate'n bul an lo ṭan tawhna fakin, an kawng tuaihnûm sa vawng nung zel tur leh an thawhrimnate hre reng turin legislator ni mekte a chah a, "Mizoram Legislative Assembly House hi zahawm leh entawn tlak taka rorelna hmun leh sawihona hmun ni ṭhin. State dangte nen khaikhinin a felfaiin boruak a ṭha ṭhin hle," a ti.

Speaker Lalrinliana Sailo chuan, MLA lo ni tawh leh ni mekte thawhhona a ṭha hle tih sawiin, "Hruaitu hmasate leh dan siam tura thlan tlin MLA-te chhe lailet dêr leh thil ṭha tih rêng rêng nei lo anga sawi ṭhin hi a pawi hle," a ti a; zirlaite tana hlâwkna a nih beiseiin kumin aṭang chuan Assembly House chu zirlaite tlawh theiha hawn a nih tawh tur a sawi.

Jubilee lawm kharna inkhawm hi Assembly secretary Lalhmahruaia Zote-in a kaihruai a, minister Dr R Lalthangliana leh FLAM president Liansuama te pawhin thu an sawi.

Mizoram Legislative Assembly term khatna leh hmasa ber chu May 10, 1972 khan neih ṭan a ni a, kum 50 a tlin lawmna pui ber chu May 9-10, 2022 khan neih niin, kum khat chhungin kawng chi hrang hranga lawm a ni.