Remna Ni pualin quiz buatsaih a ni

School Education department leh Samagra Shiksha chuan nimin khan district tinah high school zirlaite tan Remna Ni pualin Quiz Competition an buatsaih a, thupui chu 'Political History of Mizoram: 1947 (Post Independence) to 1987 (Statehood 20th February 1987) tih a ni.

Remna Ni Quiz hi district khawpui tinah DEO/DPC kaihhruaiin buatsaih a ni a; district hrang hrangah hian high school 157 aṭangin team 174 an tel. Team pakhatah zirlai pahnih zel awmin, zirlai 348 an tel a ni. Sikul pakhat aṭanga team khat aia tam tel sikulte pawh an awm.

Quiz hi district level leh state level-a intihsiakna tur a ni a, district tina pakhatna ṭheuhte chu Aizawla state level competition-ah an intihsiak leh ang.

District level quiz-a pakhatnate'n Rs 30,000, pahnihnate'n Rs 20,000 leh pathumnate'n Rs 10,000 ṭheuh lawmman atan an dawng a, state level competition-ah pawh hetiang zat bawk hi lawmman pek a ni dawn.

Remna Ni (June 30) lawmna atan School Education depatment hian June 20 khan district level essay competition an lo buatsaih tawh bawk a; essay leh quiz-a state level-a lawmmante chu June 30-a Remna Ni lawmnaah sem a ni ang.