Ruihhlo ṭhat lohzia zirlaite zirtir mek

Mizoram Police chuan International Day Against Drug Abuse and Illicit Trafficking (June 26) lo thleng tur pualin tunlai hian district hrang hrangah ruihhlo ṭhat lohzia inzirtirna, drug awareness campaign an kalpui mek.

Drugs awareness campaign-ah hian zirlaite chu ruihhlo ṭhat lohzia an zirtir a, taksa leh rilru a tihchhiat dante an hrilhfiah a; hmun ṭhenkhatah chuan ruihhlo laka fihlim tur leh ruihhlo donaa theihtawp chhuah tura intiamna, signature campaign buatsaih nghal a ni.

Bawngkawn Police Station leh All Women Police Station ṭang dun chuan nimin khan Bawngkawn Middle School-II leh PC Girls School-ah drugs aware-ness campaign an buat-saih a, zirlai 611 an tel.

Sakawrdai PS chuan June 20, Thawhlehni khan Pres­byterian English Medium School, Sakawr­daiah drug awareness campaign an buatsaih a, zirlai 59 an tel. Lawngtlai police-te pawhin Jehova Jire Higher Secondary School, Lawngtlaiah aware­ness campaign an buatsaih a, zirlai 150 chuang an tel a ni.

June 20 vek khan Serchhip police-te'n Serchhip Higher Secon-dary School-ah 'Ruihhlo, ṭhalaite hmelma' tih thupui hmangin essay inziahsiak an buatsaih a, Serchhip khawpui chhunga high school leh higher secondary school zirlai 105 chuang an tel. Intihsiaka lawmmante chu Remna Ni lawmnaah hlan a ni ang.

Hnahthial police-te pawhin June 19, 2023 khan Hnahthial district chhunga hmun pathum - Tuipui-D Middle School, Hnahthial Model Middle School leh Nono Volleyball Club, Hnahthialahte drugs awareness campaign an buatsaih a, mi 80 chuang an tel a ni.

Heng bakah hian, district danga police-te pawhin an huam chhungah ruihhlo ṭhat lohzia inzirtirna an kalpui tawh bawk.