Manipur-a Zo hnahthlakte ṭanpuina pe

Indian Youth Congress (IYC) leh Mizoram Pradesh Youth Congress Committee (MPYCC) chuan June 19, 2023-a Rahul Gandhi pian champha pualin Manipur buai vanga Manipur state chhung relief camp-a awm mek Zo hnahthlakte ṭanpuina an hlân.

IYC leh MPYCC-te hian ṭanpuinate chu Churachanpur-a relief camp atana hman Don Bosco Higher Secondary School leh Churachandpur College-ahte an hlan a; chhawmdawlna an ken tam zawk chu Manipur Pradesh Congress Committee hruaitute kutah hlanin, Manipur PCC hruaitute'n relief camp hrang hrangah an sem leh dawn a ni.

MPYCC chuan, Churachandpur huam chhungah relief camp 107 a awm a, mi 40,000 chuang an awm mek tih an tarlang. IYC leh MPYCC-te chuan relief camp-a awm hmeichhia leh naupangte bakah, nu hnute hne laite tana ṭangkai tur bungrua leh damdawi ṭhahnem tak an hlân a ni.