KHAWTHLIR

MLA-in hmanpui
Aizawl South-III bialtu MLA Prof. F Lalnunmawia chuan June 20, Thawhlehni zan khan a bial chhunga Melthum leh Hlimen venga kumin HSLC leh HSSLC-a pass-te lawmpuina hun a hmanpui a, "Vawiina zirlaite hi nu leh pate bakah khawtlang, ram leh hnam hmachhuan in ni a, chhawr tlak leh innghahna tlak ni ngei turin inbuatsaih ang che u," tiin a fuih.

Thisen pe
Mizoram UPC hnuaia Pathian thu zirna, Apostolic Theological Institute chuan nimin khan Synod Hospital Blood Bank tan thisen unit 23 an pe a; YMA, Edenthar Veng Branch-in Remna Ni pualin Synod Hospital tan thisen unit 5 an pe bawk. Thisen petute hi mipa vek an ni.

Inkâp palh a thi
Nimin chawhma dar 11 vel khan Apex Bank, Champhai Vengthlanga security hna thawk R Vanlalrinawma (30) s/o R Thantluanga (L), Champhai Vengthlang chu a silai kawl laiin a inkâp palh a, damdawi-in panpui a nih hnuah chhun dar 1 velah a hliam tuar loin a thi. Lalrinawma hi vawiin chhun dar 12-ah vui a ni ang.

NMC-in ZMC Recognition a pe
Health & Family Welfare minister Dr R Lalthangliana chuan, Zoram Medical College (ZMC)-in kum khat atan National Medical Commission aṭangin pawmpuina (recognition) a hmuh thar thu a sawi. ZMC-in NMC recognition a hmuh thu hi Minister hian Aizawla Manipur ráltlânte a tlawh kualnaah a sawi a ni. ZMC-ah hian kum 2018 khan MBBS zirna ṭan a ni a, batch hmasa berte chuan an zir zo tawh a ni.

Manipur ráltlân an pun belh zel
Manipur tualchhung buaina avanga sahimna zawnga Zo hnahthlak Mizorama lut an awm belh zel a, June 20, 2023 aiin nimin June 21 khan mi 136-in an pung. Sorkar chhinchhiah danin, nimin tlai dar 5 dinhmun ang chuan Mizoramah Manipur ráltlân mi 12,006 an awm a; Manipur ráltlânte tan Mizoramah relief camp 35 a awm a, mi 12,006 zinga 2,941 chu relief camp-ah awmin, mi 9,065 chu relief camp pawn lamah an awm thung.

AH&Vety office
AH&Vety minister Lalrinawma chuan nimin khan Hnahthialaha AH&Vety pisa thar a hawng. Minister chuan, ramngaw leh nungchate duat tak leh dimdawi taka enkawl ṭhin turin kal khawmte a chah.