Minister-in Manipur ráltlân a kan kual

Minister Dr R Lalthangliana chuan nimin zing khan Aizawl leh a chhehvel hmun pangaa Manipur ráltlânte awmna a tlawh a, "Kan unaute sahimna zawnga rawn tlânchhiate hi Mizoram sorkar leh Mizoram mipuite'n kan thlahthlam ngai dawn lo," a ti.

Dr R Lalthangliana chuan, Mizoram sorkarin ráltlânte tan hma a lak nasat thu sawiin, "Kan tih theih chin chinah kan ṭang reng ang. An hriselna uluk taka vil reng turin hma kan la char char a ni, a ti a; ráltlânte zirnaah an bahlah loh nan ruahmanna Mizoram sorkarin a siam thu a sawi.

Minister hian Manipur ráltlânte awmna hmun panga - Ṭhuampui YMA Hall, Tuirial Airfield-a Osborne Moral Reformation Centre, Berawtlanga Art & Culture Multipurpose Complex, Beraw Convention Centre leh Central YMA pisaa transit camp-te a tlawh a; an mamawh zualpui phuhrûk nan hmun paliah Rs 5,000 ṭheuh leh CYMA hnenah Rs 10,000 a hlan.

Minister hi Health & Family Welfare Board vice chairman Dr ZR Thiamsanga, MLA, Indian Medical Association, Indian Dental Association leh Mizoram Government Doctors' Association leh Central YMA aiawh ten an ṭawiawm a ni.

MINISTER-IN A TLAWHTE DINHMUN

◆ Ṭhuampui YMA Hall: Chhungkua 20 an awm a, mi 66 an ni a, naupang 20 an tel. Leader inruatin eirawng an inbàwl ṭhin.

◆ Osborne Moral Reformation Centre, Tuirial: Chhungkaw 29-a mi 115 an awm. Naupang 70 awm zinga pasarih chu primary school hnaivaiah luhtir an ni. Eirawng an inbàwl a, tuiah harsatna an tawh avangin anmahni sum séngin tui an lei ṭhin. Mi 10 vel chu an inhlawh ṭhin a; fûr a nih tawh avangin thosilên an mamawh thu Minister an lo hrilh.

◆ Art & Culture Multipurpose Complex, Berawtlang: Mi 71 an awm mek.

◆ Beraw Convention Centre: Ráltlân hnuchhamte enkawlna a ni a; DMM Children's Home, Churachanpur-a hnuchham naupang 28 leh anmahni enkawltu mi panga an awm.