CSS-a thawkte'n badge dum bel zel dawn; Pen/tool down strike turin an inbuatsaih

Centrally sponsored scheme hnuaia Mizoram sorkara thawkte chuan Study Team on CSS rawtna tipuitling tura Mizoram sorkar an phûtnaah, June 20-22 chhung badge dum an belin awmzia a neih loh avangin badge dum bel chhunzawm zel an rêl a; June 26-28, 2023 chhungin pen/tool down strike kalpui an rêl bawk.

All Mizoram CSS Employee Coordination Committee (AMCECC) chuan CSS hnuaia thawkte hamṭhatna tur chungchang zir chiangtu Study Team rawtna a taka hmang turin Mizoram sorkar an phût a; sorkar kar nan leh lungawi lohna lantir nan June 20-22, ni thum chhung an hnathawhnaah badge dum an bel. Badge dum an bel chhunga thu lawmawm an dawn loh chuan an kal zel dan tur June 22-ah rêl an lo tum lâwk angin nimin khan an rél zui a ni.

AMCECC chuan, "Lungawi lohna kan lantir mekin rah ṭha a chhuah loh avangin, Mizoram sorkar koh eih ngei theihna turin hreh tak chungin badge dum kan bel hi bel chhunzawm zel ni se, June 26-28, 2023 chhung hian pen/tool down strike neih ni se, tiin kan rêl a ni," an ti.

CSS Coordination Committee-ah hian Mizoram sorkara department hrang hranga CSS hnuaia thawk mi sing chuang an awm tih sawiin AMCECC chuan, "Hmasawnna, hriselna, zirna leh naupang enkawlna hrang hrangte a huam dawn a, he kan hmalakna avanga harsatna tâwk kan lo awm a nih pawhin mipui hriatthiamna kan dil nghal a ni," an ti a; Mizoram sorkarin a hlamchhiah nia an inhriat avanga lungawi lohna an lantir zel a ngai chu hrethiam turin mipui an ngen.