C Zopari'n nurse chawimawina sáng - Florence Nightingale Award a dawng

C Zopari, ward superintendent (retired), Dinthar, Aizawl hnenah nimin khan India rama nurse chawimawina sang ber National Florence Nightingale Award hlan a ni.

National Florence Nightingale Award hlanna inkhawm hi nimin chhun dar 11 khan President chenna Rastrapati Bhavan-ah buatsaih a ni a, India ram state hrang hranga nurse hnathawk ṭha leh chawimawi tlâk mi eng emaw zat hnenah chawimawina hlan a ni. Inkhawm hi prime minister Narendra Modi-a'n a hmanpui.

Health & Family Welfare dept. tarlan danin, C Zopari hian kum 1985-a School of Nursing, Civil Hospital, Aizawl aṭanga GNM a zir zawh hnuah kum 1896 aṭangin Mizoram sorkarah staff nurse hna a thawk ṭan a; Buarpui PHC, Chhingchhip PHC, Saiha District Hospital leh Civil Hospital, Aizawlah a thawk tawh.

August 2016 khan ward superintendent-ah a kai sang a, chumi hnuah Kolasib District Hospital leh Civil Hospital, Aizawlah a thawk a; kum 37 chhung a thawh hnuah March 31, 2023 khan superannuation pension-in a chhuak a ni.

HFW department chuan, National Florence Nightingale Award dawng thei khawpa nurse chhuanawm Mizo nu an nei chu an chhuan thu leh a chawimawina dawn an lawmpui tak zet thu an tarlang.

C ZOPARI HNATHAWH LANGSARZUAL

◉ April 18, 1989-ah naute kum khat mi, a hrawka hnute hnêkna táng vanga thaw hlei thei tawh lo, duk vek tawh chu a hrawka táng chu lak chhuahsakin a nunna a chhanhim.

◉ February 20, 1993-ah a naute chharin a hlam êk a ei nasat avangin a thaw hlei thei tawh lo a, a káah thawktir tuma hâmin (CPR) theihtawpa a beih hnuah naute nunna a chhan chhuak.

◉ October 1996 khan Lalbuatsaiha, Chhingchhip hrawka ar ruh táng chu theihtawp chhuaha enkawlin, a nunna a chhanhim.

◉ April 14, 1994-ah Chhingchhip PHC-ah nu nau vei chau, nikhaw hre loa awm tawh, nu pum chhunga naute lungphu chiang tawh bawk si lo chu huaisen tak leh thiam takin naute a cheh chhuahsak a, nu leh naute nunna a chhanhim.