Zangnadawmna pek chungchangah inrem vangin kawng dan titawp lailâwk

National Highway no. 54 laih zauh mekah ram lâk neitute'n zangnadawmna an la lâk loh avangin June 19, 2023 aṭangin Serchhip by-pass road-ah kawngpui an dang a, thuneitute nen inremna an neih avangin June 21, 2023 aṭangin kawng dan an titawp lailâwk.

Kawngpui dangtute hi kawng laitu NHIDCL hotute nen June 21 khan Serchhip bawrhsap Nazuk Kumar kaihhruaina hnuaiah DC meeting room-ah an inbia a; inremna siamin, kawng dan chu June 21 chawhnu aṭangin tihtawp a ni. Inremna anga thil a kal lo a nih chuan kawng dangtute chuan an dan leh tur thu inremnaah an tarlang tel a ni.

Inbiaknaah hian kawng dangtute chuan zangnadawmna la tihfel ve lo mi 15 vel an intêl khawm thu sawiin, "May 24, 2023-a Serchhip Additional DC hoa inbiakna kan neihah NHIDCL-ten June 18, 2023 thleng ngaichâng tura min tih angin kawngpui dan kan lo titawp tawh a, an hun tiam a ral hnuah pawh zangnadawmna tihfel a la nih loh avangin kan dang leh a ni," an ti.

Serchhip DC chuan, inbiakna hmasa neih hnua harsatnate sawiin, document tihfel ngai ṭhenkhat NHIDCL-in June 6, 2023-a an thawn chu buaipui nghal a nih thu leh VC pass-te pawh enfiah leh nghal a nih thu te, June 19-ah an peih thu leh chu chu RO-ah thawnin, tunah Delhi a thlen tawh thu a tarlang.

Ṭhutkhawm lai hian Serchhip DC chuan NHIDCL Executive Director chu telephone hmangin a bia a, NHIDCL hotu chuan pisa kai ní ni 10 chhungin an peih hman a beisei thu a lo hrilh. Hei vang hian ram neitute chuan NHIDCL hmalakna ngaihchàn leh an remti a, a hlawhtlin loh chuan kawngpui dan chhunzawm leh an tum a ni.