KHAWTHLIR

Thisen pe

Remna Ni (June 30) thleng tur pualin YMA Sub-Headquarters, Saitual leh Saitual police-te chuan nimin khan Keifangah thisen pek an huaihawt a, mipa 129 leh hmeichhia 34-te'n Civil Hospital, Aizawl tan thisen unit 163 an pe. Serchhip police-te pawhin Remna Ni pual vêkin nimin khan Serchhip District Hospital-ah thisen unit 9 an pe bawk.

Drugs awareness

International Day Against Drug Abuse and Illicit Trafficking (June 26) pualin nimin khan Ngaizawl khuaah ruihhlo ṭhat lohzia inzirtirna, drugs awareness campaign buatsaih a ni a, zirlai 350 an tel. Zirlaite chu ruihhlo laka fihlîm turin an intiam nghal a ni.

U-Win inzirtir

National Health Mission (NHM), Mizoram leh United Nations Development Programme (UNDP)-te chuan nimin khan Royale Lalawi Hotel conference hall-ah district immunization officer, medical officer leh partner agency-te pualin U-Win application chungchang inzirtirna an buatsaih. U-Win hi Ministry of Health and Family Welfare leh UNDP ṭang dunin an siam a ni a, India rama nu nau pai leh naupangte'n hri danna (vaccine) an lak ṭhin routine immunization-te digital-a kalpuina tur a ni.

Trial run dawn

Asian Development Bank hnuaia Aizawl Sustainable Urban Transport Project hmalakna kal meka zirchianna kal zelah June 23-26, 2023 chhung hian Kulikawn leh Bawngkawn inkara kawng péngṭhuam pawimawh laiah trial run neih a ni dawn a, lirthei tlân dan tihdanglam a ni dawn. Sorkar thuchhuah chuan, "Mipuite leh lirthei khalhtute lo hrethiam a, ṭhahnemngai taka lo ṭawiawma thláwp turin ngen leh hriattir kan ni," a ti.

Sorkar nawr rêl

Mizoram Upa Pawl Executive Committee chu nimin khan Aijal Club-ah an ṭhu a, mi 80 an tel. An rorel zingah, tar pension-te mumal leh rang zawka an lak theih nan sorkar nawr leh MUP branch-te'n building an neih theih nan sorkar ngente a tel. MUP headquarters, area leh branch-a office bearer ni chungin ram rorelnaa inthlanah candidate nih a rem loh thu an tarlang.

Mizoramah ráltlân 12,023 awm mek

Manipur buaina vanga sahimna zawnga Zo hnah-thlak Mizorama lut an awm belh zel a, nimin tlai dar 5 khan mi 12,023 an awm a, June 21-a awm zat aiin mi 17-in an tam zawk. Sorkar chhinchhiah danin, Manipur ráltlânte tan Mizoramah relief camp 35 a awm a, relief camp-ah mi 2,940 awmin, relief camp páwn lamah mi 9,083 an awm thung.