Robert-a'n sorkar laipui hotute a dâwr
Minister of state Robert Romawia Royte chuan June 21, Nilaini tlai khan Union Finance secretary Dr TV Somanathan chu a pisaah a kâwm a, Manipur buaina vanga sahimna zawnga Mizorama tlanchhiate dinhmun leh mamawhte a sawipui.
Robert Romawia Royte hian Manipur raltlante chungchang hi Home secretary Ajay Kumar Bhalla leh additional secretary pahnih a lo sawipui tawh a; Home Ministry-in state ramri kâna raltlante enkawlna turin scheme hran a neih loh avangin sum lamah ngaihhnathiamna Home Ministry pe vat turin Minister chuan Finance Secretary a ngen.
Finance secretary TV Somanathan chuan, Mizorama raltlan awm mekte puihna tur sum pek phalna Home Ministry-in an rawn rawt angin pek nghal a nih tur thu a lo hrilh. Minister Robert Romawia pawhin Home secretary Ajay Bhalla chu phone hmanga biain, Finance Secretary thuchah a hrilh nghal a ni.
Sorkar thuchhuah tarlan danin, Dr TV Somanathan chuan, SASCI Part-I 2023-24 aṭangin Mizoram tan cheng nuai 20,000 pek belh a nih tur thu leh pek thuai a nih tur thu a sawi bawk.
June 21 vek khan Robert Romawia chuan NITI Aayog hotute kâwmin, Mizorama aspirational district Mamit tihhmasawn dan tur a sawipui a; Union Sports secretary Sujata Chaturvedi pawh kâwmin, Mizoram tana SAI-in project a siam tawhte sanction rang turin a ngen. Minority Affairs Ministry hotute kâwm bawkin, sum pek chhuah tur awm ang angte pe chhuak thuai turin a ngen a ni.