Champhai district-ah ni 55 chhungin ruihhlo kaihhnawih thubuai 27 ziak lut

Champhai District Narco Coordination Centre (NCORD) Committee chu nimin khan bawrhsap James Lalrinchhana kaihhruaiin an ṭhukhawm a; tun hnai ni 55 chhungin Champhai district-ah ruihhlo kaihhnawih thubuai 27 ziah luh a ni a, mi 45 man an ni tih tarlan a ni.

Ṭhutkhawma tarlan danin, April 28, 2023 aṭanga June 21 thleng khan Champhai district-ah police-te'n Rs 13,72,68,000 hû heroin kg. 5.51 an man a, NDPS Act, 1985 tlawhchhanin thubuai 14 an ziak lut. Hemi kaihhnawihah hian mi 19 an man a, chu'ng zinga pathum chu ram dang mi an ni.

April 28, 2023 aṭanga June 21 inkar vek khan Excise & Narcotics department-in ruihhlo kaihhnawihah mi 23 an man a, NDPS Act tlawhchhanin thubuai 12 an ziak lut. END hian tualchhung rate-a Rs 7,52,580 hû heroin gram 627, Rs 5,700 man alprazolam gram 628 an man a; ruihhlo phurhna lirthei LMV pathum leh two wheeler pathum an man tel.

Assam Rifles-te pawhin Champhai district-ah April 28 aṭanga June 21 inkar khan mi pahnih hnen aṭangin heroin gram 600 an man a, thubuai pakhat an ziak lut. Health Services hnuaia Food and Drug Administration-in dan zâwm loa lak luh leh kawl cough syrup Codryl-T búr 200 an man bawk.

Ni 55 chhunga Police, Excise & Narcotics, Assam Rifles-te'n ruihhlo kaihhnawih mi an man zawng zawng chu mi 45 an ni a, thubuai 27 an ziak lut a ni.

NCORD hi kum 2016-ah din niin, kum 2019 khan siamṭhat a ni a, tun hnaiah chak lehzuala hmalak a ni. May 10, 2022 khan Mizoram sorkarin District NCORD Committee member tur a siam a, an hmalaknate chu Narcotics Control Bureau (NCB) hnenah an thawn ṭhin a ni.