Mipui nawlpui inentirna CM a inentir hi politics-a lemchanna - Congress

Congress party chuan, "June 21, Nilaini khan CM Pu Zoramthanga chu Ebenezer Medical Center-ah MRI tiin a inentir nia sawiin, mipui zinga a ṭhu chu MNF party-in ‘VIP culture nuaibona’ tiin social media-ah nasa takin an tidarh a, hei hi dam lohna hmanga mipui rilru lâk tumna (publicity stunt) mai niin kan ngai," an ti.

MPCC chuan thu­chhuah siamin, sorkar damdawi-in changtlung tak State Refferal Hospital, man tlawm zawka pan tur a awm laia CM-in mimal damdawi-in a pan chu zirtirtuin a thawhna sikul ring zo loa private school-a a fate a kaltir nen a inang reng niin an tarlang a; Health minister Dr R Lalthangliana leh sorkar damdawi-ina thawktute chunga rinna a nghah lohzia a lantir niin an sawi.

CM Zoramthanga'n damdawi-ina thawktute leh mipui inentir ve dangte tihbuai hlau leh mi pangngai anga lan a tum laiin, a kalkawngah erawh chuan nasa takin traffic a ti jam nia sawiin MPCC chuan, "He thil hi VIP culture nuaibo tumna lam aiin, intihlàr tumna mai mai leh politics thila lemchanna dik tak a ni tih a tichiang hle," an ti.

MPCC chuan, CM hriselna chungchanga duty tur doctor leh ambulance ruahman a nih thu sawiin, "Amah enkawltute timualpho zawngin chêt a la a, damdawi-ina hmanrua leh doctor-te indaih loh laia amah viltu ambulance leh medical team a hranpaa neih a ngai lo tih chiang takin a lantir a ni," an ti bawk.