Agro-Forestry leh Social-Forestry hnuaiah Minister-in ṭanpuina a sem

Environment, Forests & Climate Change (EFCC) minister TJ Lalnuntluanga chuan nimin khan Kolasib Venglaia Parish Hall-ah Agro-Forestry leh Social-Forestry hnuaiah kut hnathawktute hamṭhatna a sem.

Ṭanpuina sem hi Kolasib, Kawnpui, Bualpui leh Bairabi-a kut hnathawktu mi 148 hnenah pek a ni a, first instalment Rs 15,000 ṭheuh pek an ni. Hamṭhatna dawngtute hian huan hectare khata zauah thing rah nei chi 1,100 zel an phun dawn a, thing phun tur chu EFCC department-in a thlâwnin an pe dawn. A enkawl nan Rs 28,500 an dawng dawn a, an hmalaknate chu EFCC range officer-te'n an vilpui ang.

EFCC Minister chuan, ramngaw leh nungchate nêk chêpna leh sik leh sa inthlak vanga buaina nasa lutuk tur vên nan Green India Mission hnuaiah ramngaw awm sa humhalh leh siam belhna tur Agro-Forestry leh Social-Forestry ruahman a nih thu a sawi a; "Dan mumal tak hnuaiah ramngaw leh nungchate humhalh a ni," tiin, ram leilung hausakna hlut thiam tura inzirtirna nasa taka kalpui a nih thu a sawi.

TJ Lalnuntluanga chuan, Agro-Forestry leh Social-Forestry kaltlanga hamṭhatna dawngtute chu suma chantir theih thing rah nei chi hrang hrang phun belhah hma la thar turin a chah a; Mizorama ramngaw awmte chu company lian tak takte'n carbon sink-a hman a nih theih nan indawrna a kal mek thu a sawi bawk.

Ṭanpuina sem inkhawm hi ACF Thanliana Hauhnar-in a kaihruai a; MLA K Laldawngliana leh district forest officer Margaret Lalramchhani te pawhin thu an sawi a ni.