MNF-in CM hmalakna lawmawm an ti

Mizo National Senior Front (MNSF), Mizo National Woman Front (MNWF), Mizo National Youth Front (MNYF) leh Ex-Mizo National Army (Ex-MNA) hruaitute nimina ṭhukhawm chuan resolution siamin, "Chief minister Zoramthanga kaihhruai Mizoram sorkarin sum harsatna naménlo kara ram hma-sawnna leh himna tura hma a lakna hi lawmawm kan ti," tiin an tarlang.

MNF party-a péng hrang hrang hruaitute ṭhutkhawm hi MNYF bultumin Mizo Hnam Rûnah neih a ni a, MNYF president Dr L Thangmawia'n a kaihruai. L Thangmawia chuan, lalna leh thuneihna chu Pathian ta a nih thu sawiin, "An sawi ang em em hian CM Zoramthanga hi dik lo ni se, Pathianin a CM tir lo ang. Tuna kan kal dan en hian term thara kan sorkar leh sorkar loh hi kan kutah a awm a ni," a ti.

Dr L Thangmawia chuan ZPM chungchang sawiin, "Mizo mipuite huaisen taka bumin ZPM hian kohhran hi kan party a ni tih leh, unit din a ngai lo titute hian an tih loh tura an sawite hi an ti vek tawh. Party ṭhenkhat candidate puan ruala buai tur an awm kan lo tih ṭhin pawh a takin a rawn thleng ta mek a ni," a ti a; ZPM chu an beih ngai loin anmahni an inbei niin a sawi.

RESOLUTION DANGTE

▶ Kum 2023 Mizoram inthlanpui lo awm turah MNF-in sorkarna a chan leh ngei theih nan lungrual taka Pathian ráwn chunga hmalakho zel ni se.

▶ Myanmar, Bangladesh leh Manipur tualchhung buaina vanga sahimna zawnga Mizorama rawn tlan lutte Mizoram sorkar leh mipuite'n kan lo tuamhlâwm zel hi lawmawm kan ti a, kan unaute tana huaisen taka khawvel hriata ding ngam CM Pu Zoramthanga kan chhuang tak zet.

▶ UPSC preliminary exam-ah Mizoram aṭanga mi 12 inziak tling an awm hi lawmawm kan ti a. Ṭhalaite hmasawnna tura kawng hrang hranga Mizoram sorkar hmalakna hian rah duhawm tak a chhuah zel kan beisei.

▶ Ram tana kan rawngbawlpui political party dangte’n an chhungkuaah buaina nasa tak an tawh mek laia MNF-in buaina tâwk loa lungrual taka ke kan pên tlâng zel hi lawmawm kan ti.