MSCU-in General Assembly an hmang

Mizoram State Cooperative Union (MSCU) chuan nimin khan Dawrpui Multipurpose Hall-ah Annual General Assembly vawi 34-na an hmang a, minister Lalruatkima'n a hmanpui.

Inkhawmpui hi MSCU chairman K Lalchamreia'n a kaihruai a, kum 2022-23 chhunga MSCU Annual Report leh 2021-22 Annual Audited Report sawihona leh pawmpuina hun hman a ni. Kum 2023-2028 chhunga president atan K Lalchamreia leh vice president atan F Lalchungnung an thlang a, Board of Directors member tur mi pali an thlang bawk.

Minister Lalruatkima chuan, MSCU chu Mizorama cooperative society hrang hrang khai-khawmtu pawimawh a nih thu sawiin, "Ram sum leh pai dinhmun siamṭhatnaa cooperative society-te pawimawhna hriain sorkar laipui pawhin Ministry of Cooperation a din. Mizo nun ze mawi - huaisenna, rinawmna leh taimaknate chu society movement-ah ṭangkai taka seng luh theih a ni," a ti a, cooperative society-te hmasawn nan thawhhona ṭha a pawimawh thu a sawi.

MSCU hi March 29, 1975 khan din a ni a; hnathawh dan kalphung duanga kaihruaitu leh a ṭul anga hma latu atan Board of Directors din a ni.