Skywalk & ropeway-ah dik tâwk lo a awm; Chhui chiang lehzual turin ACB tih an ni
Lokayukta-in Chaltlang leh Durtlang inkara ropeway siam tur leh Sakawrhmuituai tlanga skywalk siam tur chungchang chhui tura a ruat Anti Corruption Bureau (ACB) chuan thil dik tâwk lo an hmu chhuak a, Lokayukta chuan chhui chiang lehzual turin tun hnai khan a hriattir.
Vanglaini palai zawhna chhángin Lokayukta chairman C Lalsawta chuan, ACB-in preliminary inquiry an zawh tawh thu a sawi a, "An report pawh an rawn thehlut tawh a, thil dik lo hmuh an nei. Chuvangin, chiang lehzuala thil hmuh chhuah a nih theih nan regular investigation ti turin kan hriattir leh tawh," a ti.
Lokayukta hian ACB chu thil chhui tura a tihin preliminary inquiry a tihtir phawt ṭhin a, an thil hmuh chhuah azirin thubuai tihtawp emaw, regular investigation turin thutlukna a siam ṭhin.
Lalsawta chuan, dan dik loin skywalk leh ropeway siam tura rawih company-te hnenah sum pek a ni ngei tih ACB-in an hmuh chhuah thu sawiin, "Chutih laiin, tute'n nge pe tih lam tarlan tel a ni lo. Tute nge dan dik loa pawisa petute leh thil dang hrang hrang chhui chiang leh turin kan ti a ni," a ti a; regular investigation ti tura hriattirna chu June 1, 2023 khan ACB-ah an thawn thu a sawi.
Tarlan tawh ṭhin angin, MNF party-a Vigilance department leh Legal Board-te chuan skywalk leh ropeway siamnaah thil dik lo a awm nia ngaiin November 22, 2021 khan Lokayukta-ah complaint an thehlut a ni.
December 7, 2021 khan chhui phal dilna Mizoram sorkara Vigilance department-ah thehluh a ni a; Vigilance-in a zir chian hnuah December 17, 2021 khan chhui phalna a tichhuak a, ACB chuan December 22, 2021-ah chhui phalna an dawng.
Tourism department pawhin skywalk leh ropeway chungchang chu chhui chian ṭha an tih avangin Director hmingin February 3, 2022 khan Lokayukta-ah an thlen. Chhui ṭul an tih chhan te, contract agreement te, contract amount te, rinhlelh an neih leh neih lohte leh thil dang dang Lokayukta chuan Tourism department hnenah a zawt lêt a ni.
Tourism department chuan Lokayukta zawhna hrang hrangte an chháng a; rinhlelh an neih leh neih loh zawhnaah erawh chuan, mimal/company rinhlelh tarlan an nei lo thung.