Kum 2017 aṭanga lei dawh ṭan tawh Taitesena Group YMA-in an enfiah

YMA, Taitesena Group chuan June 22, Nilaini khan Saikhawthlir dáia Teirei luia lei dawh mek an enfiah. Lei hi kum 2017-ah dawh ṭan a ni a, PWD, Kawrthah Division enkawlna hnuaiah SatGuru Engineering & Alied Services (SEAS)-in an dawh a ni.

Taitesena Group YMA tarlan danin, lei dawh tur zawnna (tender) chu kum 2017-ah chhuah niin, tihfel ngaite tihfel veleh SEAS-in lei dawh hna an thawk nghal. Mahse, lei ban innghahna (foundation) leilung a ṭhat loh avang leh fûr ruahtui vanga a ko a min hêk zel avangin hnathawh a kal tluang thei lo.

A tira DPR anga lei thui zawng metre 80 tura ruahman chu kum 2018-a tuilian nasain a ko a tihmin nasat avangin kum 2019-ah ennawn a ni a; ennawn hnuah lei sei zawng (span) chu metre 102-a thui niin, sum ruahman (estimate amount) pawh tihsan a ni.

Teirei lei hlui zawk pawh a dotu banpui a min tel avangin thui tak dawh zawm belh a ni tawh a; April 2023 aṭangin lirthei kal theih turin hawng leh mah se, lirthei lian (heavy vehicle) load la tan kaltlang a ni lo.

Lei dawhna sum tumtu NABARD chuan September 30, 2023 hmain lei dawh zo hman turin an beisei a, mahse, hna viltu PWD chuan zawh hman an inbeisei lo. March 30, 2024 hmaa dawh zawh hman an inbeisei thu Taitesena Group YMA hruaitute an hrilh.

Taitesena Group YMA chuan, lei dawh hna chu uluk taka chhunzawm zel tur leh mipuiin ṭangkai taka an chhawr thuai theihna tura ṭang turin PWD leh contractor SEAS hotute an ngen a ni.