Pawl 4-in thu dik lo sawiah PE SDO an puh

Young Lai Association (YLA) Sub-Headquarters, Lai Women Association Sub-Headquarters, South Vanlaiphai Group YMA leh Sangau Joint VC-te chuan thuchhuah inṭawm siamin, kawlphetha an neih ṭhat loh chungchangah Hnahthial Sub-Division-a Power & Electricity SDO B Lalchhanhima chu thu dik lo sawiah an puh.

Sangau leh a chhehvel khuate'n thla khat chhung power supply an neih mumal loh chungchang social media leh hmun danga puanzar chu Hnahthiala PE department SDO B Lalchhanhima'n thu dik tawk lo tiin a sawi a, chu chu June 17, 2023 zana LPS Vision chanchin tharah puan a nih thu an tarlang a; SDO chu thu dik lo sawiah an puh a ni.

Pawl palite chuan, "Pu B Lalchhanhima'n Sangau leh a chhehvel khaw 12 - Darzo, S Vanlaiphai, Lungpuitlang, Kawnpui, Muallianpui, Sangau, Pángkhua, Thaltlang, Cheuràl, Râwlbûk, Lungtian leh Varṭek khuate'n kar thum vel power supply kan hmuh mumal lohna social media lama kan au chhuahnate chu thu dik tâwk lo tia a sawi hi pawi kan ti hle a, hetiang hi thleng nawn tawh lo se tih kan duh tak zet a ni," an ti.

Pawl palite tarlan danin, 33 KV Sub-Station, Hnahthialah transformer lian 1.6 MVA a chhiat avangin a thlâkna tur 2.5 MVA thar hmang turin bun tawh ni mah se, pressing hun a duh rei deuh avangin transformer 2.5 MVA awm sa pakhat chauh hmangin feeder hrang hrang inên chhâwk theih ang angin kalpui mêk a nih thu, PE department mite'n chiang takin an sawi a ni.

SDO B Lalchhanhima'n load sem chhuah dan Hnahthial Control Room-ah felfai takin hmuh theih a ni a tih angin, June 22, 2023 khan khawtlang hruaitute'n a hmunah an enfiah a; power supply an hmuh mumal lohzia an finfiah niin an tarlang.