Tun hnai inthlana kan chêt ṭhat lohna eptute boruak ṭha loin a hliahkhuh - Vanlalzawma

MNF vice president Vanlalzawma chuan, tun hnai inthlana MNF party an chêt ṭhat tâwk lohnate chu eptu party-te boruak ṭha lo leh chêt chhiatnate'n a hliahkhuh leh thuai niin a sawi.

Vanlalzawma hian nimin khan Mizo Hnam Rûna inkhawmah thu sawiin, MNF chu Pathianin a ṭanpui ṭhin niin a sawi a, "Tun hnai chhoa inthlana kan chêt ṭhat tâwk lohnate chu opposition party-te boruak ṭha lo leh chêt chhiatnate'n a hliahkhuh leh thuai a. Chu chuan party mipui min tiphûr thar leh a, sorkar leh ngei turin kan bei a, kan sorkar leh ngei pawh a beiseiawm hle. Hengte hi Pathianin kan ṭhatna tura rem a ruatna zel a ni," a ti.

Kolodyne Multi Modal Transit Transport Project (KMMTTP) chu peih a ni thuai dawn nia sawiin Vanlalzawma chuan, "Paletwa leh Sittwe-ahte lawng chawlhna peih a ni deuh vek tawh a. A hlawhtlin hunah chuan kan hawi lam kan thlâk deuh vek dawn a, bungrua tam zawk chhim lam aṭangin man man zawkin kan chawlût tawh dawn," a ti a, phai lam aṭangin bung­ruate Mizoram kal­tlangin an la tawh zawk dawn niin a sawi.

Vanlalzawma chuan, KMMTTP a hlawhtlin theihna atan hun hmasa lam aṭangin MNF hruaitu Zoramthanga, Tawnluia leh MP-te'n an thawh hlâwk hle niin a sawi bawk.