Sakhaw zalenna vawng him turin Congress-a awm a ngai - Lalnunmawia

Congress party chuan nimin khan Congress Bhavan-ah political session an nei a, Lalnun­mawia Chuaungo-in thu sawiin, sakhaw zalenna vawng hima veng him turin Congress party a awm a ngai niin a sawi.

Lalnunmawia Chuaungo chuan, Cong­ress party chu India ram zalenna sual chhuaktu leh hnam tênaute dikna humhalhtu a nia sawiin, "Sakhaw zalenna chawinungtu a ni a, hnam hnufual zawkte leh sakhaw tlem zawkte thlavâng hauhin a humhalh ṭhin," a ti a; BJP chu hnam leh sakhaw chungchang buainaah a ngawi reng tih sawiin, "Sakhaw zalenna vawng hima veng him tur chuan Congress party a awm a ngai a ni," a ti.

Ram leh hnam din chhuahna tak tak atana thawk turin Congress party lo chu an awm lo nia sawiin Lalnunmawia chuan, kum 2023 inthlan zawh aṭangin Pathian duh danin Congress party-in ram leh hnam tan hna an thawk ṭan dawn niin a sawi.

Lalnunmawia Chuaungo chuan, MNF leh Congress party chu Mizorama party ruhrel lian ber ni mahse sorkar turin neutral vote a pawimawh tih sawiin, "Pu Lalsawta hi Mizoram mipui rin ber a ni. Tu nge chief minister atana ṭha ber ang tih thlir chunga vote thlak turin mipui kan zirtir a pawimawh," a ti.

Party tinah MLA fel tak tak awm ṭeuh mah se, CM berin a zir loh chuan ramin hma a sawn dawn lo tih sawiin, "CM ṭha kan mamawh," a ti bawk.