Champhai dist.-ah ASF vangin vawk 268 thi

Champhai District Committee on African Swine Fever & Other Trans-boundary Animal Diseases (TAD) chu nimin khan bawrhsap James Lalrinchhana kaihhruaiin DC conference hall-ah an ṭhukhawm. Champhai district-ah vawk 6,000 vel a awm a, chu'ng zinga 268 chu ASF kaihhnawih vangin a thi tih tarlan a ni.

Ṭhutkhawma tarlan danin, Champhai district-ah vawk 6,000 chuang a awm mek zinga kumin chhunga ASF vanga nimin thlenga thi tawh vawk 86-te chu Ngur, Zote leh Champhai Vengsanga mite a ni a; vawk 182 suat a ni tawh. ASF kaihhnawiha vawk thi leh suat tawh zawng zawng hi 268 a tling.

ASF léng thawh khatnaah khan May 9, 2021-ah Zokhawtharah ASF hmuh ṭan a ni a, Champhai district-a khua/veng 11-ah a darh a, vawk 549 a thi. ASF thawh hnihna, February 4, 2022 khan Champhai Electric Veng aṭangin a léng ṭan a, khua/veng 41-ah vawk thi leh suat 8,454 a awm.

James Lalrinchhana chuan, ASF vanga Champhai district-a vawk eng emaw zat thia sum hloh zat chu cheng nuai 650 dáwn a nih thu a sawi a, "Kumina ASF léng thar leh hi ngaihthah lo a, theihtawp chhuaha khuahkhirh tuma hmalak tlân a tul," a ti a; insûmtheihna leh thuawihna nen dan zamte ṭha taka zâwm turin mipui a chah.

ṬHUTKHAWMA REL LEH TARLAN

▶ Khawpui chhunga vawk thi, phûmna nei lo tan YMA Sub-Hqrs, Champhaiin Keifangtlang, Hmunhmelṭha kawng thlanga ram hman hawh an phal.

▶ Nikum lama vawk phûmna atana hman tawh chu a ṭul anga ruahman leh ni se, khaw hrang hrangah VC-te'n ruahmanna lo siam se.

▶ Champhai district veng leh khaw hrang hranga vawk, vawksa leh vawksa aṭanga thil siam lak luh/lak chhuah khap ni se.

▶ ASF donaah YMA, VC leh AH&Vety department-te ṭha taka thawhho dan tur AH&Vety-in lo duang se.

▶ Mipui hnena VC tlangau kaltlanga ASF chungchanga hriat tur pawimawhte puanzar ṭhin ni se. Line department dangte nena thawkhoin inzirtirna a remchan dan anga kalpui ni se.