Pathian malsawm tlâka thawh a ṭul - ZPM General Secretary

ZPM party chuan nimin khan an pisaah political session hun an hmang a, general secretary JK Dawngzuala'n thu sawiin, mi dang rawngbawlsaktu tur an nih angin, mi zawng zawng tana ṭha tur ngaihtuah a ṭul thu leh Pathian malsawm tlâka thawh a ṭul thu a sawi.

JK Dawngzuala chuan, ZPM-te chu dik turin an inzirtir ṭhin tih sawiin, "Dâwt sawi ai chuan na ngam zawk turin kan infuih. Kan ramin harsatna a tawh mek lian tak pakhat chu, chhungkhat lainá induhsakna (nepotism) a ni a, mi dang rawngbawlsaktu tur kan nih angin kan zavaia ṭha zawk kan ngaihtuah tur a ni," a ti.

ZPM chuan malsawm tlâkin hna an thawk tur a ni tih sawiin JK Dawngzuala chuan, "Malsawma kan dawnte pawh min tichapotu ni loin mal min sawmtu Pathian hre reng chungin ram rawng kan báwl zawk tur a ni. Kalphung thar, mipui sorkar dik tak siam turin kan inbuatsaih tur a ni,” a ti a; ZPM chu mipui ngaihzâwn an nih mek thu leh sorkarna siam tura mi beisei ber an nih thu a sawi.

JK Dawngzuala chuan, "Politics kan hmelhriat dan hi party hrang hrangte inkâp tawna an inbeihna te, dâwt thu tlemtê sawia kan chan a ṭhat dawn chuan pawi tih lohnate ni berin a lang. Dâwt vár tih ṭawngkamte pawh kan hre ta fo mai. Hetiang politics hi min kawhhmuh a tum a ni ber lo a, politics chu mi dang tana inpekna mai bakah, ram leh mipui chawi kân hi a tum ber a ni tur a ni," a ti.