CSS-a thawkte'n badge dum bel mek

All Mizoram CSS Employees Coordination Committee (AMCECC) chuan Study Team on CSS rawtna tihlawhtling tura Mizoram sorkar an nawrnaah June 20-22 chhung hna an thawhna hmuna badge dum an bel hnuah thu lawmawm an dawn loh avangin badge dum an bel chhunzawm zel.

Centrally sponsored scheme hnuaia Mizoram sorkara thawkte hian nimin nen ni li chhung badge dum belin hna an thawk tawh a; an hmalaknain awmzia a neih loh zel chuan kar leh aṭangin, June 26-28, 2023 chhungin pen/tool down strike (hna thawh loh) kalpui an tum a ni.

AMCECC-a tel National Health Mission hnuaia thawkte pawl, NHM Employees Union, Mizoram (NEUM) chuan June 22, 2023 khan NHM Mission Director hnenah lehkha thawnin, pen/tool down strike chu an zawm ve dawn thu an hrilh.

NEUM chuan an lehkhaah AMCECC-ah an tel tih tarlangin, "Pawlah kan tel ve avangin pen/tool down strike hi kan zawm ve dawn a, keini department bikah chuan emergency duty tih loh chuan hna kan thawh a rem dawn lo. Kan harsatna leh kan dinhmun ṭhat lohziate min hriatsaktu ber i nih angin i hriatthiamna kan ngen e," tiin an tarlang.