CM-in PWD, Hnahthial Division a hawng

Chief minister Zoramthanga chuan nimin khan Hnahthialah PWD Division thar, executive engineer-in a ṭhut chilh tur a hawng a; Mizoram chu hnam dang laka zahawma a awm theih nan leh Mizo nihna zahpuiawm a nih lohna turin malsawmna hai chhuah tur a awm tih hriaa ram hmangaihna nen hmalakho a ṭul thu a sawi.

PWD, Hnahthial Division pisa atan hian PWD Inspection Bungalow hman a ni a, executive engineer pakhat, SDO pathum leh thawktu dangte an awm. Division hawnna puala inkhawm chu Hnahthial Electric Veng community hall-ah hman a ni.

CM Zoramthanga chuan, ram inrêlbàwlna ṭha zawk a awm theih nan district siam belh a nih thu a sawi a, "Mizoramin rambuai paltlangin, theihtawp chhuaha ṭanrualna avangin remna leh muanna kan nei a, chu chu hmang ṭangkaia ram nuam leh entawn tlakin kan ram hi kan siam tur a ni," a ti.

Zoramthanga chuan, "Mizoram hi hnam dang laka zahawma a awm theih nan leh Mizo kan nihna zahpuiawm a nih lohna turin malsawmna hai chhuah tur a awm tih hriaa ram hmangaihna nen hmalakho a ṭul," a ti a; kalkhawmte chu hmalakpuiah a sáwm.

Bialtu MLA Dr R Lalthang­liana, minister pawhin thu sawiin, "Hripui lêng, raltlan, ran hri léng leh harsatna hrang hrang tawrhna karah sum indaih lohna awm chung pawhin district tharte ngai pawimawha sorkar hmalakna hi a lawmawm," a ti a; district thar bakah, hriselna lamah te, inkalpawhna leh eizawnna turahte state pum huapa hmasawnna ruhrel lian tham tak tak hawn theih mai leh ruahman mekte a awm thu a sawi.