Serchhipah Youth Centre hawn a ni
Mizoram Youth Commission (MYC) chairman Dr Vanlalṭanpuia, MLA chuan nimin khan Serchhip Darnam Vengah MYC Youth Centre a hawng. Youth Centre hi SEDP sum cheng nuai 300 sénga sak a ni.
MYC Chairman chuan, Mizoram sorkarin UPSC exam-ah Mizo ṭhalaite an tlin theih nan theihtawp a chhuah thu sawiin, "Mizote hi theihna sang tak nei kan ni a, tih tak zeta kan beihna a piangah sang tak kan thleng thei zel. UPSC exam-ah erawh kan dinhmun a la hniam tlat mai a, he mutàn hi hneh tumin MYC chuan hma kan la a, sorkarin sum min pe a, kan thlen tum hi kan hnaih hret hret a ni," a ti.
Mizo ṭhalai zingah IAS nih tum ruh tlat tam tak an awm tawh nia sawiin Vanlalṭanpuia chuan, "Kawng dik kan zawh chhoh zel avangin engtikah emaw chuan kan la tling chur chur dawn. Super IAS 2023 buatsaih leh tumin MYC chuan hma kan la mek a, theihna nei nia kan hriatte chu Delhi-ah coaching kaltir kan tum," a ti a; zirna lamah chauh ni lo, eizawnna kawng dang dapa ṭhalaite tuai hriam zel an tum thu a sawi.
Dr Vanlalṭanpuia chuan, MYC kaihhruaina hnuaiah sipaiah Mizo ṭhalai 70 an tlin tawh thu te, mi 142-in sorkar hna an hmu tawh thu te, mi 38-in bank lamah hna an hmuh thu leh mi 40 chuangin hmun dangah hna an thawh tawh thute a sawi bawk.