Convention Centre sak tur lung phûm

Deputy chief minister Tawnluia chuan nimin khan Tuikual North-ah Multi Utility cum Convention Centre sak tur lungphùm a phúm.

Centre hi North Eastern Council aṭanga hmuh cheng nuai 299.91 hmanga sak tur a ni a, Planning and Programme Implementation department chu nodal department niin, UDPA department chu implementing agency a ni. Chhawng thuma sak tur niin, restaurant, thlai zawrhna bazar, conference hall leh lirthei dahnate awm tura duan a ni a, a panna kawng siam ṭan a ni tawh.

Deputy Chief Minister chuan, Aizawlah hmasawnna hrang hrangte duhthusam ni lo mah se, ram leilung khat lutuk leh hmun chêp lutuk vangin duh angin hmasawnna kalpui theih a ni lo ṭhin tih a sawi a, "Heti chung hian hmun âwl tuaihnûm tur a awm a nih chuan sorkarin hma a lak thuai zel ka beisei," a ti.

UDPA department-in Aizawl khawpui cheimawi leh tuaihnûm nan nasa takin hma an la tih sawiin Tawnluia chuan, "Smart City kaltlangin project lian tham tak tak kalpuia lungphùm phùm zel a ni. Khawpui chhung lirthei veivâk tâwt lutuk sutkianna tura parking space siam ka ngai pawimawh hle," a ti a; Multi Utility Convention Centre satu turte chu felfai tak leh ṭha taka thawk turin a chah.

Inkhawmah hian bialtu MLA Lalruat-kima, minister pawhin thu a sawi a ni.