KHAWTHLIR

East-I viltu tur Lalthansanga

ZPM Nomination Committee chuan kumina Mizoram inthlanpui atana Aizawl East-l bial vil turin nimin khan ZPM vice president Lalthansanga (Chatea), ex-MLA an ruat. ZPM Nomination Committee hi nimin khan an ṭhukhawm a, "Aizawl East-l (Gen) Assembly constituency chu ZPM party tana bial hima lo vil turin Pu Lalthansanga (Chatea) ruat a ni," tiin an tarlang.

Damdawi hlân

Mizo Zirlai Pawl General Headquarters chuan June 22, Ningani tlai khan Hmar Inpui, Manipur hnenah damdawi ṭhahnem tak an hlan. Damdawi inhlanna hun hi MZP Pisapui, Aizawlah neih a ni a, damdawite chu Manipur buaina vanga harsatna tâwk mekte hman turin MZP adviser F Lalnienga'n Hmar Inpui, Hmarram Region president Elmuonvel Buongpui hnenah a hlan a ni.

Damdawi zirhona

Health & Family Welfare department-a Food & Drugs Administration chuan nimin khan Bawngkawn South Cultural Centre-ah 'Damdawi hmansual chungchanga damdawi zuartute mawhphurhna' tih zirhona an buatsaih a; Aizawl East district chhunga damdawi zuartu, general license leh wholesale license neite an tel.

Kawlphetha awm dawn lo

Power & Electricity department chuan vawiin hian Luangmual 132kv Sub-Station-ah hna an thawh dawn avangin kawlphetha an pe chhuak dawn lo a; zing dar 9 aṭanga tlai dar 4 inkarah Ropaiabawk, Zotlang veng ṭhenkhat, Zonuam, Rangvamual, Phunchawng, Chawlhhmun, Edenthar Veng, Hunthar ṭhenkhat, Central Jail, Ainawn Veng, Chaltlang Lily Veng ṭhenkhat leh Bawngkawn veng ṭhenkhatah power supply a awm dawn lo.

Senghawi turin ti

Mamit District Road Protection Squad chuan nimin khan Mamit khawpui kawngpui dunga in sakna bungrua leh bungraw dang, kawngpui tichêp theia dahte an enfiah. Vantlang kawngpui tana hnawk theia bungrua leh thil dang dahte chu senghawi turin hriattirna lehkha an pe nghal a ni.