MNF-in 2018 inthlan dawna an thutiam an tihlawhtling dawn lo tih a chiang tawh - Congress party

Congress party chuan, MNF sorkar chu an sorkar chhungin zêldin thu leh insawi hlim chawpin hun an hmang tluan nia sawiin, kum 2018 inthlan dawna an thutiamte an tihlawhtling thei dawn lo tih a chiang tawh niin an tarlang.

MPCC Media department hotute chuan June 24, Inrinni khan Aizawl Press Club-ah thuthar thehdarhtute an kâwm a; an chairman Dr Lallianchhunga chuan, "MNF sorkar hian kum 2018 inthlan dawna a thutiam zawng zawng kha an tihlawhtling thei dawn lo tih a chiang tawh. Mipui tana hamṭhatna leh hmasawnna awm si loin an duhsak zawngte nen rem leh rem lo pawh thlu loin an chawm a, an háwp bawk a ni," a ti.

Dr Lallianchhunga chuan, MNF party-in December 15, 2018 aṭanga sorkarna an chelh aṭangin kum ngana a ni mek a, ṭum nga budget an pharh tawh tih a sawi a; inthlan dawna an intiamnate leh mipuiin MNF an sorkartir chhan, kum nga dawn an sorkar tawh chhunga an la tihhlawhtlin lohte a tarlang a ni.

MPCC Media Chairman chuan, "Hetianga ram mipui an pawisak lohzia thlir hian Mizoramin anmahni avanga harsatna kan tawh zel lohna tur leh kan ram, kan hnam, kan sakhua a him zel nan Central-a BJP sorkar thawhpuitu MNF sorkar hi hnâwl turin Mizoram mipui kan sáwmin kan ngen a ni," a ti a; MPCC president Lalsawta erawh chu enchhin ngai lo, kut fai, mi rinawm leh Pathian ṭih mi a nia sawiin, Lalsawta hoa sorkar ṭha siam tura thawhpuiah mipui a sáwm.

MNF TIHHLAWHTLIN LOH MPCC TARLANTE

▶ Buhfai : August 20, 2018 khan Mizo Hnam Rûnah MNF president Zoramthanga'n MNF an sorkar hunah Mizo mipuiin vai buhfai an rin tawh loh tur thu leh Mizo buh an rin zawk tawh tur thu a sawi. Vawiin thlengin mipuiin vai buh an la ring a, sorkar pawhin ration atan vai buhfai a la supply ta zel.

▶ Traffic Jam awm lohna : October 17, 2018-a Aizawl East-II MNF Workers' Meet-ah MNF President-in sorkarna an chan chuan Aizawl khawpui chu motor parking-a harsatna awm lo, traffic jam awm lohna state capital (khawpui) awm chhunah an siam dawn tih a sawi. Kum 5 a liam dáwn tawhah pawh niléng deuh thawin traffic a la jam. Cheng nuai 1,000 chuang sèn tawhna PAHOSS-ah sorkar tan hmuh lêt tur a awm miah lo.

▶ Kawng chhâwng : Kawng chhâwng siam hi 2018 inthlan dawn khan ZONET interview-ah Zoramthanga'n a sawi. June 6, 2013 khan Aizawl South-II MNF Block Conference, Kulikawn YMA Hall-a neihah, "Kulikawn aṭanga Chanmari inkar hi target hmasak kan tum ang,” tiin a sawi tawh bawk. An sorkar tàwpna kum an hmang mek chungin kawng chhâwng siamna tur DPR pawh an lo la siam lo.

▶ SEDP : MNF flagship programme SEDP-ah Rs 3,00,000 mipui pek an tiam a, hei vang hian kum 2018-ah MNF chu hneh taka thlan tlin an ni. 'NLUP dawng tawh zawng zawng pawhin in dawng vek ang...' ti hialin Zoramthanga’n a sawi. Kum 5 chhungin chhungkaw 60,000 tan Rs 50,000 chauh an ruahman a, chu pawh chu ṭum hnihah Rs 25,000 ve vein an pe thei ṭâwk ṭâwk a ni.