CM thawkrim, taima, nationalist leh vision nei ṭha Zoramin kan nei - MNF

MNF Media & Publicity department chuan June 24, Inrinni khan Aizawl Press Club-ah thuthar thehdarhtute an kâwm a; Mizoramin Chief Minister thawk rim, taima, nationalist leh hmathlir nei ṭha a neih thu an tarlang.

MNF Media & Publicity general secretary VL Krosshnehzova chuan CM Zoramthanga fakin, "Chief Minister thawk rim, taima, nationalist leh vision nei ṭha, a taka hna thawk mi, sawichhiat leh elrêl nasa tak a tâwk chung pawha chhang ve ngai lo Pu Zoramthanga Zoramin kan nei hi kan chhuang tak zet. A kaihhruaina hnuaia Mizoram hmasawnna lo lang zel hi a lawmawm," a ti.

Mi ṭhenkhatin hna thawk mang lo, eng mah ti lo ang hialah MNF sorkar an chhuah fo nia sawiin Krosshnehzova chuan, "Kan CM kaihhruaina hnuaiah hian hripui rapthlak tak léng leh harsatna hrang hrangin min tlâkbuak karah nasa takin he sorkar hian hmasawnna hna a thawk," a ti a; MNF sorkar chu mahni thil tih ṭhat puan chhuah leh infak lam uar lo tak, mipui tana ngawi renga hna thawk mawlh mawlh ṭhin niin a sawi.

MNF Media GS chuan, Zoramthanga hmalakna avang liau liauin sorkar laipui budget-ah Aizawl by-pass road siamna tur cheng vbc. 500 leh bamboo link road laihna tur cheng vbc. 100 dah a nih thu a sawi a, "Union budget-a Mizoram hming a hranpa meuha a lang ve ta hi kan CM hmalakna liau liau a ni a, a ropui kan tiin chhuanawm kan ti hle," a ti.

Zawhna chhangin VL Krosshnehzova chuan, Aizawl by-pass road siamna tur sum leh bamboo link road laihna tur sumte chu zang-nadawmna leh a buaipui chhung a rei avangin hmuh a la ni loa a hriat thu a sawi.

MNF MEDIA & PUBLICITY TARLANTE

▶ Lei verh lian tham km. 2.40-a thui Sairang chhak Kurung lui kânin Rangvamual epah twin tunnel (metre 9 ve ve) - Bawngkawn Brigade ruam - Muthi ruam - Tuirial Airfield - Seling thlen hmaa chhuak turin buaipui mek a ni. Tender tawh a ni a, tunnel bik hi DPR final ṭêp a ni.

▶ District pathum MNF sorkar hmasaa pek tawh chu Congress sorkarin an tihlawhtling duh lo a, kum 2018-a MNF a sorkar leh khan Saitual, Khawzawl leh Hnahthial district tihpuitlin nghal a ni.

▶ Kum 2000-a peace bonus cheng vbc. 182.50 non plan head-a Finance Ministry aṭanga CM Zoramthanga’n a sawi chhuak kha thil mak a ni. Nimin piah maiah pawh SASCI Part-I 2023-24 hnuaiah CM ngennain Union Finance Secretary-in cheng nuai 20,000 Mizoram pek belh a nih tur thu MoS Robert Romawia a hrilh.

▶ SEDP, PMGSY, SASCE, SASCI, NABARD, CRIF, NEC, World Bank leh ADB fund hmangin cheng vbc. 50 chung lam hnathawh paruk a awm.

▶ Kawng siam (strengthening, re-design, repair & rehabilitation) zawh tawh paruk a awm a, kawng siam (construction & maintenance, improvement & upgradation, strengthening, widening, patch repair, re-surfacing, etc) zawh tawh 110 chuang a awm a, PWD enkawlna hnuaiah building 78 chuang sak zawh tawh a ni.

▶ Agriculture links road SASCI hnuaiah km. 47 laih a ni tawh. Khelmual 25 laih mek leh laih zawh tawh a awm a, futsal ground 8 siam a ni. Volleyball/basketball court 13 siam a ni a; women centre, market shed, community centre 28 sak a ni tawh a, vantlang inthiarna leh waiting shed 64 siam a ni.