Mizoram sorkara CSS hnuaia thawkte'n vawiin aṭangin hna an thawk dawn lo

Centrally sponsired scheme (CSS) hnuaia Mizoram sorkara thawkte'n vawiin June 26 aṭanga hna thawh an tum loh chungchangah June 24, Inrinni khan deputy chief minister Tawnluia nen inkâwm mah se, pen/tool down strike an kaltlangpui dawn.

CSS hnuaia thawk pawl hrang hrangte intêl khawmna, All Mizoram CSS Employees Coordination Committee (AMCECC) chuan Study Team on CSS rawtna tihlawhtling turin Mizoram sorkar an phût a; sorkarin a tihhlawhtlin mai loh avanga lungawi lohna lantir nan leh tihlawhtling tura sorkar kar nan June 20-23, 2023 chhung khan badge dum bel chungin hna an thawk. June 26-28 chhungin pen/tool down strike kalpui an tum bawk.

June 24 khan sorkar kohna angin AMCECC hruaitute chu deputy CM Tawnluia leh DPAR officer-te nen an inkâwm a; AMCECC chuan, "Deputy CM-in CSS-te tana hma min lo laksak tawh dan ngaihthlak niin, theihtawp min chhuahpui avangin lawmawm kan ti hle. Amaherawhchu, kan phût anga Chief Minister hmuh kan dilna chu remchang min siamsak thei lo. CM hmaihma ngeia kan hmuh hma chuan kan hmachhawp pen/tool down strike hi kaltlangpui tur a ni," an ti.

An kal zel dan tur chu Chief Minister an hmuh hnuah emaw, CM an hmu thei lo a nih pawhin, AMCECC-in a ngaihtuah leh tur thu an tarlang bawk.

Hetih lai hian AMCECC-a tel NHM Employees Union, Mizoram chuan pen/tool down strike an zawm ve dawn thu NHM Mission Director an hrilh tawh a, "Keini department bikah chuan emergency duty tih loh chuan hna kan thawh a rem dawn lo," an ti a; an dinhmun leh hna an thawh loh tur chungchang chu hrethiam turin an ngen a ni.