MP C Lalrosanga'n president's rule-a Manipur dah a ṭhat a rin thu a sawi

Union Home minister Amit Shah chuan June 24, Inrinni khan Delhi-ah all party meeting a ko a; he hunah hian Lok Sabha MP C Lalrosanga chuan Manipur chu president's rule-a dah mai ṭhaa a hriat thu a sawi.

C Lalrosanga chuan, Manipur sorkarin tun thlengin buaina an chingfel thei lo tih sawiin, "An hlawhchham avangin an rorelna tihtawp a, president's rule-a dah mai a ṭha zawkin ka ring. Inrêlbàwlna hran siam ngiatnate pawh a awm a, hei hi uluk taka ngaihtuah a ngai," a ti.

Manipur buaina tuartute tuam dam leh inremna boruak siam turin theihtawp chhuah a ṭul thu sawiin C Lalrosanga chuan, "Chumi rual chuan buaina chhuahna chhan bul tak tak chhui chhuah a ngai," a ti a, an ram leilung nena inkungkaih an buaina bulpui chinfel a ṭul thu a sawi.

Ṭhutkhawmah hian political party hrang hrang hruaitute leh aiawhte'n Manipur buaina chinfel dan tur ṭha nia an hriatte an sawiho a ni.