Doctor nghet dah phûtin Tipa-ah vawiin aṭangin picketting

Joint Action Committee, Tipa chuan thuchhuah siamin, kum 2020 aṭangin Tipa Primary Health Centre (PHC)-ah doctor nghet an awm tawh loh avanga lungawi lohna lantir nan vawiin aṭanga June 28 thleng office picketing an huaihawt dawn tih an tarlang.

Tipa damdawi-in (PHC) chu Mizorama damdawi-in din hmasak pawl a ni tih sawiin JAC chuan, "Kum 2020 aṭangin doctor nghet nei loin kan awm mek. Khawtlang hruaitute'n vawi eng emaw zat sorkar thuneitute hnenah kan thlen tawh hnu leh JAC kaihhruainaa sit-in demonstration kan huaihawt chung pawha kan mamawh ang chhanna leh inbiakna hlawhtling tun thlengin kan la hmu lo," an ti.

Tuipang JAC-te chu June 24, Inrinni khan an ṭhukhawm a, June 26-28, 2023 chhung office picketing huaihawt an rél a, "Tipa khaw chhunga department pisa leh zirna in zawng zawng khâr vek tura hriattir kan ni. Heti chung pawha Mizoram sorkarin doctor nghet min pek loh chuan June 30, 2023-ah meeting neiin, lungawi lohna lantir dan tur ngaihtuah chhunzawm a ni ang," an ti a; JAC hmalakna thláwp turin mipui an ngen a ni.