Minister-in silai kahna siam mek a tlawh

Sports & Youth Services minister Robert Romawia Royte chuan June 24, Inrinni zingah khan Falkland Venga Mizoram Rifles Association (MRA) Shooting Centre siam mek a tlawh a; "Silai kah hmanga inelnaah lawmman (medal) lak tur a tam avangin ngaih pawimawh a ṭul," a ti.

Robert Romawia chuan, MRA leh Falkland Veng Local Council-te'n ṭhalaite mamawhna hriaa an sum sénga silai kah zirna bul an ṭan chu lawmawm a tih thu a sawi a, "Silai kah hmanga inelnaah lawmman lak tur a tam avangin ngaih pawimawh a ṭul hle. Sorkarin sum tam tak a sên lohna discipline mah ni se, Mizo silai kap thiamte'n state pawn aṭangin medal tam tak an kâp chhuak tawh a ni," a ti.

MRA Centre bula Falkland LC-in Sports Centre tur an ruahman chu Sports Minister hian a tlawh nghal a, LC-ten rawtna an neih angte chu bialtu MLA Zoramthanga, chief minister hnenah thlenin, a lo sawipui tur thu a hrilh a ni.