Congress party-in street campaign an nei

MPCC Campaign Committee leh MPYCC chuan June 24, Inrinni zing khan Aizawla Chanmari bazarah 'Ṭhat loh theih lohna sorkar ṭha, kalphung dik siam tura hmalakna beihpui' thlakna street campaign an buatsaih.

Street campaign-ah hian MPCC treasurer Dr Lalmalsawma Nghaka chuan, Congress sorkar kal tain thil ṭha tam tak a ti a, hmasawnna nasa tak a thlen rualin, tihfuh tâwk lo leh ṭha lo lai a awm tih an hai loh thu a sawi a, "Pu Lalsawta hoin tihfuh tâwk lohte chhui lêtin, a ṭha lo lai siam ṭha a, a ṭha thei ang bera ram leh hnamin hma a sawnna tura theihtawp chhuah hi Congress party tum ber a ni," a ti.

Dr Lalmalsawma chuan, "Ṭang puihna hmanga thawk rim leh mi taimate dinchhuahna ramah Zoram hi siam a, mipui huapzo sorkar, mi náwlpui tana innghahna leh thlamuanpui tham sorkar ṭha leh kalphung dik kan siam dawn a ni," a ti bawk.

Thusawitu dang MLA Lalrindika Ralte chuan, Mizoram leh mipui ṭhatna turin theihtawp chhuaha beih chu mi tin mawhphurhna a nih thu sawiin, "Sorkar ṭha siam thei tura party belh tlak, hruaitu dik leh rinawm, sorkar ṭha siam tura a kalphung dik leh dik lo lai hre chiangtu Pu Lalsawta leh a kaihhruai Congress party hi kan tihtlin a ngai a ni," a ti.

AMC corporator Rosiamngheta pawhin thu sawiin, "Mizoram party lian leader pathum zinga kut fai ber, sorkar enkawl tura arkhawthim dai lo tur, mi dik leh rinawm, nachang hria kan nei. Zoram sorkar kalphung dik lo laite siam ṭha a, hmasawnna min thlenpui tur Congress party lo chu an awm lo," a ti a; Congress party chu BJP paihthla thei awm chhun a nih avangin Mizo mipuiin an thlâwp a ngai niin a sawi.

Street campaign-ah hian Lalhriatrenga Chhangte leh Lalnunmawia Chuaungo te pawhin thu an sawi a ni.